"Euskararen inguruan sentsazio kontrajarriak daude Euskal Herriko zenbait txokotan. Batetik, pairatzen jarraitzen ditugu euskaldun komunitateari egindako zaurien ondorioak, urrun gaude hizkuntza normalizatu bat izatetik. Eta aldi berean, batzuek sentsazioa dute euskaldunok gehiegi eskatzen ari garela, eta erdaldunak baztertzen. Zenbateko erantzukizun konpartitua dugu lur hauetako biztanle guztiok? Zer da gehiegi eskatzea? Nola lortu euskaldunok eta euskarak merezi dugun justizia, bidean errespetuz jokatuta biztanle guztien bestelako lehentasunekin eta arazoekin? Zergatik ez da doakoa oraindik euskara ikastea? Euskararen normalizazio bidean eman beharreko urratsei buruz hausnartzeko aukera eskaini nahi du Aleak".

Gogoeta horrekin aurkeztu dute Arabako Aleako kideek datorren astearteko mahai-ingurua. Ondorengoek hartuko dute parte Arabako Foru Aldundiko Euskara zerbitzuburu ohi  Jokin Larrañagak, Hizkuntz Eskubideen Behatokiko zuzendari Agurne Gaubekak eta ELA sindikatuko Euskara arduradun eta abokatu  Pello Igeregik.