2026-2027 ikasturterako ikastetxeetan matrikulatzeko epea iritsi da. Euskal Eskola Publikoaz Harro plataformatik jaialdi bat antolatu dute, “eskola publikoa dela gure seme-alabentzako aukerarik onena” familiei esateko helburuarekin.

Plataformako kideek azaldu dutenez, publikoa babestu nahi dute “bizikidetzaren, pluralismoaren eta kohesioaren babesleku kolektibo gisa pribatizazioa, indibidualismoa eta intolerantzia nagusitzen ari diren garai hauetan”.

Adierazi dutenez, “eskola publikoa gure gizartearen errealitatea islatzen duen aniztasuneko bizikidetzaren ispilua dela” eta horregatik familiei dei egiten dute igande goizean Santa Barbara plazan antolatu duten egitarauan parte hartzera, eta baita seme-alabak eskola publikoan matrikulatzera ere.