Europako Justizia Auzitegiaren arabera, Espainiako Gobernuak hartu zuen neurriak ez ditu behin-behineko kontratazioaren abusua geldiarazteko baldintza nahikoak biltzen, eta beraz, Europako legediaren aurkakoa da. Hego Euskal Herrian ofizialki 45.000 langile publiko daude egoera horretan, eta sindikatuen esanetan 77.000 dira.

Europako Auzitegiak ez du Espainia behartzen langile horiek finko egitera, ez baitu horretarako eskumenik, baina irizpideak eman dizkio. Esaterako, kontrol neurriak ezartzea behin-behineko kontratuen abusuzko erabilera eragozteko, edo kaltetuentzako erreparazioa ematea. Hori Espainiako Auzitegi Gorenak egin beharko du, baldintza argiarekin: behin-behineko langileak plazarik gabeko langile finko bilakatzea ez dela konponbidea. Europako auzitegiak dioenez, formula horrekin langileek ez diotela uzten behin-behinekoak izateari.

Espainiako Gobernuak, baina, adierazi du Europar Batasuneko Justizia Auzitegiaren erabakia “argigarria” baino ez dela, Espainiak “gehiago egin behar” duela esatera mugatzen dena, “baina ez du behartzen modu batera edo bestera egitera”, eta ez du herrialdea zigortzen.

Berriak jaso duenez, Interinok Taldea sindikatuak Europaren ebazpen berria txalotu du, eta Amaia Zarrabeitia bozeramailearen ustez, ebazpenak indargabetu egin ditu Espainiako Gobernuak eta Auzitegi Gorenak erabili izan dituzten argudioak. Bere ustez, orain bi konponbide posible daude: “Interinoak finko bilakatzea edo estatuak dirutza gastatzea kalte ordainetan”. 

ELAk, auzi horren aurrean, adierazi du Hego Euskal Herriko enplegu publikoaren egoera “dramatikoa” dela, eta Eustaten datuak erakutsi ditu: “Behin-behinekotasunaren batez bestekoa %35etik gorakoa da. Tasa horrek hirukoiztu egiten du sektore pribatukoa, eta osasungintza bezalako esparruetan %40tik gora kokatzen da”. Sindikatuak gaineratu duenez, “konponbidea, nahitaez, langile horiek kontsolidatzea eta etorkizunean egoera hori berriro errepikatzea eragotziko duten neurriak artikulatzea izango da. Eta aipatutako araudiak ez du bermatzen ez gauza bat, ez bestea”.