Etxebizitzaren jabetza Blackstone putre funtsaren eskuetan geratu zen hipoteka-egikaritze baten ostean eta, ondoren, urteak eman ditu hutsik eta baldintza kaskarretan. Etxebizitza Sindikatuak azaldu duenez, orduan, okupatu eta birgaitu egin zuten beste alternatibarik ez zuen pertsona talde batek.

Orain urtebete, Etxebizitza Sindikatuarekin antolatuta, negoziaketak hasi ziren jabearekin. «Eroskeria saiakera baten eta hainbat mehatxuren ostean», orain, bide judizialaren azken fasean daudela azaldu du sindikatuak eta emaitza, «segurtasun osoz», berehalako etxegabetze-agindua izango dela.

Putre funtsak

Krisi garaia bizi dugula ohartarazi du Etxebizitza Sindikatuak eta «etengabe erasotuak» direla langileen bizi-baldintzak. Etxebizitzaren alorra, testuinguru horretan, ondasun metaketa iturria da jabe txiki zein handientzako.

Egoera horretan ari dira putre funtsak ugaritzen. Korporazio horiek «arrisku handiko» hipotekak eta higiezinak merke erosten dituzte, saldu eta irabaziak lortzeko. Blackstone da espainiar Estatuan putre funtsik handienetako bat.

«Putre funtsek jabetza ugari metatzen dituzte, higiezinen merkatua eta etxebizitza arloko politikak baldintzatzeko gaitasuna lortuz», azaldu du Etxebizitza Sindikatuak.

Sindikatuak gogorarazi duenez, Estatu burgesari «mesede» egiten dion funtzio bat betetzen dute horrelako funtsek, etxegabetzeen «koste ekonomiko eta mediatikoak aurreztuz». Gainera, krisi garaietan «banku eta erakunde publikoentzat titulu arriskutsuak direnak» negozio iturri bihurtzen dituzte.

Etxebizitza-sistema eraldatzeko beharra

Etxebizitza-sistema osoa «berrantolatzeko» beharra aldarrikatu du Etxebizitza Sindikatuak: «etxebizitza-sistema sozialista berri bat», etxebizitza den oinarrizko ondasuna doakoa, kalitatezkoa eta unibertsala izango dena.

Norabide horretan jardun bitartean, gogorarazi dute, autodefentsaz egingo dietela aurre «jabe handi zein txikien erasoei».