Proiektua bideratzeko baino, egindakoa jada finantzatzeko laguntza dirudi, Bartzelonako kontzertua dagoeneko egin delako, eta Madrilgoa datorren larunbatean izango da, apirilaren 25ean, Movistar Arena aretoan. 

Eusko Jaurlaritzaren iritziz, "proiektuak milaka lagun bilduko ditu eta euskara ardatz duen esperientzia kultural integrala eskaintzen du", eta ekimen honen bidez Jaurlaritzak "berresten du euskararen sustapenarekin eta euskal kulturaren nazioarteko proiekzioarekin duen konpromisoa."

Musika proiektu zehatz batera diru-laguntzak bideratzen diren aurrekari bat izan zen 2008. urtean, Urte hartan Kepa Junkerak egitasmo baterako 702.000 euroko laguntza jaso zuen "kulturen arteko harremanak eta euskal musika hedatzeko eta berritzeko" egitasmo batu lotuta, eta Jaurlaritzako Kultura eta Etxebizitza Sailen artean finantzatu zen laguntza hura. Beste musikari batzuen protesta eta manifestua eragin zuen laguntza hark, eta kantu baten sorrera ere bai: Zesatek taldearen 'Maite zaitut Miren Azkarate", orduko Kultura sailburuari opa izan ziotena  Junkeraren kontu honengatik. Etxebizitza sailburua, berriz, Ezker Batuko Javier Madrazo zen orduan.

Testuinguruan jartzeko, Mastodonen aipatu digutenez, 300.000 edo 700.000 euro ez dira hainbeste beste gastu publiko batzuekin alderatuta. Lagun baten kalkuluaren arabera, Abiadura Handiko Trenaren estimatutako gastua 9.000.000.000€ da. 49.800€ metroko. Hau da, ETSrentzakoa AHTren sei metro adina da.