Google konpainiak, Google Maps bilatzailea sortu zuen lehendabizi, gero Google Earth, jarraian Google Moon eta, orain, Google Mars, Marteren gainazala zehaztasun handiz ezagutzeko aukera eskaintzen duen zerbitzu kartografikoa. Planeta gorria hiru modutan esploratu dezakegu: Mars Global Surveyor zundak bidalitako datuetan oinarritutako altuera maparen (Elevation) bidez, irudi infragorrien (Infrared) bidez eta Mars Orbiter kamerak ateratako argazkiak (Visible) kontsultatuz. Marteko tontor, haran, kanoi, krater eta abarrak bilatzeaz gain, gizakiak bidalitako zunda guztiek non lur hartu duten jakin dezakegu Google Mars zerbitzu kartografikoari esker.