Astearte goizean Espainiako Poliziak gutxienez bi lagun atxilotu ditu, bat Getxon eta bestea Bilbon, Hezbollah milizia xiitarekin harremana dutela leporatuta. Iranekin Bat plataformako kideak dira. Plataformak atxiloketak gaitzetsi ditu eta elkartasuna helarazi die atxilotuei. 

Efe berri agentziak azaldu duenez, iturri polizialen arabera bi atxilotuak Telegrameko kanal bateko partaideak dira. Iturriek azaldu dute kanalean miliziaren eta palestinar talde armatuen propaganda zabaltzen dela, Iraneko eta Israelgo soldaduen aurkako irudiekin batera. 

Espainiako Auzitegi Gorenak abiatu du operazioa, eta sekretupeko sumarioan dago. Erregistroak egiten jarraitzen dute eta ez dute baztertzen atxiloketa gehiago egitea. Atxiloketetako baten unean, hainbat gazte bildu dira inguruan; atxilotuari elkartasuna adierazi diote eta palestinar erresistentziaren aldeko aldarriak egin dituzte. Espainiako Poliziaz gain, Ertzaintza ere agertu da eta tentsio uneak izan dira. 

"Palestinar kausa kriminalizatzeko gezur asko leporatzen dizkiete", idatzi du Iranekin Bat plataformak sare sozialetan. Plataformak atxiloketak "Espainiako prentsatik abiatu den jazarpen, gezur eta difamazioekin" lotu ditu. Maiatzean Irango enbaxadoreak hitzaldiak eman zituen Euskal Herriko hainbat herritan, eta plataformak adierazi du une horretan Espainiako komunikabideetatik seinalatuak izan zirela. 

Publiko egin dute atxiloketen aurrean Telegrameko kanalean zabaldutako mezua, non adierazten den haien helburua "guztiz informatiboa" dela eta irakurleei "albiste objektiboak" helaraztea, "betiere sionismoak saldu nahi duen posturatik at". 

Plataformak Palestinarekiko duen elkartasuna berretsi du eta iragarri du ostiralean egingo dutela prentsaurrekoa.