Espainiako Poliziak bart, astelehenean, Itzubaltzetako gazte bat atxilotu du, gizonezkoen Munduko Futbol Txapelketako finalaren egunean izandako istiluengatik; hirugarren atxilotua da dagoeneko. Itzubaltzetako Gazte Asanbladak eta Aske antolakundeak sareetan jakinarazi dutenez, finalaren egunean "euskal selekzioaren ofizialtasunaren alde" mobilizatzeagatik eta "Cake Minuesa probokatzaileari aurre egiteagatik" atxilotu dute. 

Asanbladak elkarretaratzea egin du bart arratsean, atxilotua askatzeko exijitzeko eta errepresioa salatzeko. Elkarretaratzean antolatzera deitu dute: "Beharrezkoa ikusten dugu espainolismoaren eta faxismoaren aldarrien normalizazioaren eta errepresioaren aurka antolatzea". 

Espainiako Poliziaren hirugarren atxiloketa

Ohartarazi zuten atxiloketa gehiago etor litezkeela, eta gertatu da. Finaleko istiluengatik atxilotutako hirugarrena da honakoa. Pasa den astean Espainiako Poliziak bi pertsona atxilotu zituen. Aske daude jada, baina lesioak, gorroto delitua eta desordena publikoa egitea egotzi diete. 

Atxiloketen abiapuntua gizonezkoen Munduko Futbol Txapelketako finalaren eguneko istiluetan ustez parte hartzeagatik da. Egun hartan istiluak izan ziren Euskal Herriko  hainbat tokitan eta Ertzaintzak hogei pertsona identifikatu zituen. Momentuon 50 pertsona daude ikerketapean, "arau hauste larriak" egiteagatik, Bingen Zupiria Eusko Jaurlaritzako Segurtasun sailburuak jakinarazi duenez.   

Nabarmentzekoa da Espainiako Poliziak gauzatu dituela atxiloketak. Pasa den asteko atxiloketen harira, Zupiriak salatu zuen Poliziak "bere eskumenetatik kanpo" jardun zuela, ordena publikoko eta herritarren segurtasunarekin lotutako ekintzak Ertzaintzari baitagozkio. Sailburuak aurreratu zuen afera Espainiako Gobernuari helarazi zitzaiola. Ordea, astebete baino gutxiagoan, Poliziak atxilotzen duen hirugarren pertsona da honakoa.