Espainiako Auzitegi Nazionaleko Fiskaltzak helegitea aurkeztu du Unai Parot presoari hirugarren gradua ezartzeko erabakiaren aurka. Iraila hasieran onartu zion Eusko Jaurlaritzako Justizia Sailak hirugarren gradua Paroti, presondegiko Tratamendu Batzordearen txostenean oinarrituta. 

Gaur egun erdi-askatasuneko erregimenean dago Parot, Eusko Jaurlaritzaren Espetxe Araudiaren 100.2 artikulua aplikatuta. Horri esker, iaztik du presondegitik ateratzeko aukera, astelehenetik ostiralera, egunez, boluntario lanak egiteko, eta kartzelara itzuli behar du gauetan. Fiskaltzaren arabera, 100.2 artikulua aplikatu zenetik pasatako denbora ez da nahikoa hirugarren graduaren erdi-askatasuneko erregimenean sartzea ahalbidetuko luketen faktoreak erabat finkatutzat jotzeko. Hori horrela, aurkeztutako helegitea ebazten duten arte baldintza horietan segituko du presoak.

40 urteko kartzela zigorra ari da betetzen Parot.