Amaitu da. Jada ez da beharrezkoa Gipuzkoako 8-12 urte bitarteko haurrek Eskola Kirola programan parte hartzea kirol federatu batera apuntatu nahi izanez gero. 

Auzitegi Gorenak atzera bota du Gipuzkoako Foru Aldundiaren helegitea EAEko Justizia Auzitegi Nagusiak aurkeztutako sententziaren aurka. Iazko urtarrilean aurkeztu zuen sententzia auzitegiak, eta ezeztatu zuen 13 urte baino gutxiago dituzten haurrek derrigorrez Eskola Kirola egin beharra.

Ordura arte, 8-12 urte bitarteko haurrek, klub batean aritu nahi bazuten derrigorrezkoa zuten Eskola Kirola egitea, Multikirol programan izena emanda. Araba, Bizkaia eta Nafarroan, aldiz, ez, legeak baitio ezin dela inor "derrigortu".

Auzitegi Gorenaren erabakia funtsezkoa da hemendik aurrerako ikasturteetarako. Halere, amaitzear dagoen ikasturtean jada ez da horrelako derrigortasunik izan. 2025eko urte hasieran Justizia Auzitegiak aurkeztutako sententziarengatik Gipuzkoako Foru Aldundiak bertan behera utzi zuen Eskola Kirolean parte hartzeko bete beharra. 

Familia baten salaketarekin hasi zen dena. Kexu ziren adin horrekin klub batera apuntatzeko derrigorrezkoa zela, aldi berean, Eskola Kirola egitea, nahiz eta haurra gustura ez egon hori egiten. Kirolaren Euskal Legeari jarraituta, Gipuzkoako Foru Aldundiaren argudioa zera izan zen: espezializazio goiztiarraren arriskua ekidin eta haurraren hezkuntza-garapena babestea zuela. Are, legeak dio edozein umek "bermatua" izan behar duela kirolerako sarbidea.

EAEko Justizia Auzitegi Gorenaren sententziak hori guztia aintzat hartzen bazuen ere, gehitu zuen "ezin direla alde batera utzi adingabeek kirol-praktikaren garapenean dituzten aukerak eta lehentasunak".