Zehazki, Leioako Lamiako eskola publikoko jangelako menuen kalitateaz galdetu du EH Bilduko legebiltzarkide Ikoitz Arresek: ikastetxeko menuetan zizareak agertu direla nabarmendu du eta catering enpresarekiko kontratuan eraginik izango al duen galdetu dio Begoña Pedrosari. “Zer egingo du sailburuak hau berriro gerta ez dadin?”, luzatu dio.

Pedrosak garbi utzi nahi izan du zerbitzuaren kalitatea “modu integral eta jarraituan bermatuta dagoela prozesu osoan zehar; esleipenetik hasi, instalazioak, ekipamendua eta tresnak gainbegiratu, lehengaiak hautatu eta menuak prestatu arte”. Adierazi du sistema osoa kontrol eta betekizun tekniko “zorrotzek” arautzen dutela, “profesional kualifikatuek” gainbegiratzen dutela eta auditoriak eta elikagaien “etengabeko analisiak” egiten direla.

“Irizpide teknikoaren arabera, plater batean intsektu bat egotea ez da, berez, janariaren kalitate-gabeziaren adierazgarri; aitzitik, produktuaren jatorriaren hurbiltasunarekin eta lehengai fresko eta naturalen erabilerarekin lotuta egon daiteke –gaineratu du–. Hurbileko produktuekin eta pestizidarik erabili gabe landutako produktuekin lan egiteak erabilera kimiko txikiagoa dakar, eta horrek, salbuespenezko kasuetan, horrelako gorabeherak eragin ditzake, baina horrek ez du esan nahi ezarritako elikagaien kalitate- edo segurtasun-estandarrak betetzen ez direnik”.

Dena den, prozedurari jarriki, catering enpresari dagozkion analisiak eta egiaztapenak aurkezteko eskatu zaiola jakinarazi du Begoña Pedrosa Hezkuntza sailburuak.

Catering enpresekin haserre

Behin baino gehiagotan izan dira albiste eskoletako jangelak eta horiek hornitzen dituzten catering enpresak, janarian zomorro edo antzekoren bat agertu delako (berriki kontatu dugu ARGIAn Basauriko ikastetxeko kasua) edo guraso elkarteek salatu dutelako kalitate eskaseko menuak zerbitzatzen dituztela (adibiderako, Bizkaiko Guraso Elkartearen inkesta hau).

Gero eta gehiago dira beren sukalde propioa izatea eskatu duten ikastetxeak, eta aspaldiko aldarrikapena da eskola jantokiek catering-enpresetatik kanpo funtzionatu ahal izatea, baina horretarako araudia aldatu beharko luke Eusko Jaurlaritzak.