Neurria Elkarrekin Podemos IU alderdiaren eskaera izan da, Arabako Aldundiko aurrekontuak onartzeko EAJ-PSE gobernuarekin burutu dituen negoziazioen testuinguruan. “Beharrezkoa da errealitate historiko hori Arabako Arte Ederren museoaren sarreran ikusaraztea, esklaboen merkataritzaren tragedia Arabako herriaren memorian inskribatzen laguntzeko", adierazi du alderdiko bozeramaile David Rodríguezek.

Ondorengoa da plakan azalduko den mezua: "Gaur egungo Arabako Arte Ederren Museoa eraikitzeko erabili zen kapitala Julian de Zuluetak utzitako herentziatik dator, esklaboen salerosketarekin eta XIX. mendean Kuban egindako ustiapenaren bidez dirutza eta aberastasun handiak metatzetik. Oroitzapen plaka hau esklabotza desagerrarazteko eta maila globalean esplotazioaren eta pertsonen salerosketaren aurka borrokatzeko erabiltzen da".

Esklaboen salerosketa Kuban

Egun Arabako Arte Ederren museoa hartzen duen eraikina, Augustin Zulueta jauregia, Elvira Zulueta eta Ricardo Augustin senar-emazteen bizitokia izan zen 1912 eta 1916 bitartean, haiek agindu zuten eraikitzea. 1941ean Ricardo Augustinek, alargunduta, Arabako Foru Aldundiari saldu zion. Jauregia eraikitzeko Elvira Zuluetak bere aita Julian de Zuluetaren herentziatik jasotako kapitala baliatu zuen. Julian Zuluetak dirutza egin zuen XIX. mendean Kuban esklaboen trafikoarekin, eta Habanako alkate izatera ere iritsi zen.