Izaro Ibargurenen esanetan, 7:30erako hesiz inguratuta eta itxia zuen Ertzaintzak Gasteizko Alde Zaharreko Kanpokale Berria kalea, eta etxebizitzara gerturatzen saiatu diren zenbait pertsona "kolpeka" kanporatu dituela lekutik. 12:30erako ezarrita zegoen etxegabetze agindua, eta hala egin dute. 

Etxebizitza horretan hamalau urte bizitzen zeramatzan 8 eta 10 urteko haurrak dituen familiak eta guztira 75.600 euro ordaindu dizkio jabeari alokairuan. Auzoan Bizi Etxebizitza Sindikatuko kidearen esanetan, hilero gastuak eskuz ordaintzen zituzten, 2021ean jabeari transferentzia bidez ordaintzea eskatu zioten arte –ordainketen erregistroa geratzeko–. Ordea, jabeak horri uko egin eta etxegabetzeko prozesua hasi zuen; hilabete batzuk geroago jaso zuten etxegabetzeko agindua.

Etxegabetzeen aurkako moratoriaren ondorioz, etxegabetzea 2025eko abendura arte atzeratzea lortu zuten, Espainiako Kongresuak moratoria horrek indarrean ez jarraitzea erabaki zuen arte. Hasiera batean etxegabetzea uztailaren 9an gauzatzea zegoen aurreikusita, baina "lan sindikalari" esker ostiral honetara arte atzeratzea lortu dutela nabarmendu du Auzoan Biziko kideak.

Erantzuleak

Ibargurenek salatu du etxebizitzaren jabeak uko egin diola negoziatzeari eta sindikatuarekin biltzeari. Gainera, gaitzetsi du Gasteizko Gizarte Zerbitzurik ostegunera arte ez diela familiari alternatibarik eskaini, eta hori ere ez dela "duina": zehazki, pentsio batean astebete igarotzea. Bi adin txikikoak Alde Zaharreko Ramón Bajo ikastetxeko ikasleak dira, eta hango guraso elkarteak salatu du ezin dela "haurren eta nerabeen ongizatea babestu etxegabetzeen aurka" egin gabe.