EH Bilduko Gorka Ortiz de Guinea legebiltzarkideak egindako idatzizko galdera baten erantzuna da Zupiria sailburuarena. Erantzun idatzi laburrean, sailburuak onartu du azken bost urteotan Ertzaintzak ez duela “Zigor Kodearen 305. artikuluarekin zuzenean lotutako ikerketarik” egin. Ogasun Publikoaren aurkako delitutzat hartzen dira eta zigortu egiten dira administrazioari iruzur egiten diotenak zergak ordaintzea saihestuz, bidegabeko onura fiskalak edukiz eta konturako diru-sarrerak saihestuz.

Zupiriak gehitu du delitu mota horren “funtsezko” alderdia dela 120.000 eurotik gorako iruzurrak baino ez direla delitutzat jotzen. Erantzunean ez du zehaztu kopuru horretatik beherako kasuak aurkitu eta bazterrera utzi dituzten.

Eldiario.es hedabideak jaso duenez, EH Bilduk udaberrian Ertzaintzako hainbat unitate espezializatutako langile kopuruez galdetu zion sailburuari. Delitu ekonomikoetara bideratutako ertzainak sei baino ez dira eta gaur egun kriptotxanponekin eta ziberdelituekin lotutako ikerketan ere hartzen dute parte. Eldiario.es hedabideak alderatzeko datu bat eman du: Espainiar Estatuko Guardia Zibilaren Unitate Zentral Operatiboak (UCO) 500-600 langile ditu. Joan den astean Espainiako Gobernua eta Eusko Jaurlaritza delitu ekonomikoez hizketan aritu ziren eta Espainiako Gobernuak Ertzaintzari Kapital Zuritzearen eta Arau-hauste Monetarioen Prebentzio Batzordearen Zerbitzu Exekutiboan sartzeko aukera emango dio hemendik aurrera.