Apirilaren 18an, Altsasuko gazteen aurkako hirugarren epaiketa egunean, manifestazioa egin dute Gasteizko Kanpuseko ikasleek, epaiketa salatzeko eta gazteei elkartasuna adierazteko. Manifestazioa hasi bezain laster, Ertzaintzak mobilizazioa eten du, gazteek baimenik ez zutela argudiatuz.

Tentsioak gora egin du eta Ertzaintza ikasleen aurka oldartu da. Poliziek, ikasleen aurka egin dute, manifestariak kolpatuz. Are gehiago, salatu dutenez, hauetako baten kamerari ere eraso egin diote eta hau kentzen saiatu dira.

Gutxienez, ikasle bat identifikatu dute bertaratutako ertzainek. Minutu batzuk beranduago, mehatxuak gaindituz, manifestazioak aurrera egin du. Behin ekitaldia amaituta, poliziek “segada” bat egin dietela salatu dute ikasleek, gazte gehiago identifikatuz.

Zarata ateratzeko deia

Altsasukoak Aske Gasteizek deituta, epaiketako lehenengo astean elkarretaratze zaratatsuak egingo dituzte Arabako hiriburuan:

• Apirilaren 19an: Europan, Faroloian eta Pepe Ubisen.
• Apirilaren 20an: Martxoak 3 plazan

Albiste hau Hala Bedi irratiak argitaratu du eta CC-By-SA lizentziapean ekarri dugu ARGIAra.