Astelehenean iritsi da Anatoly Kolodkin Errusiako petrolio-ontzia Kubara, 730.000 petrolio kupelekin. Miguel Díaz-Canel presidenteak adierazi du hiru hilabeteetan lehen aldia izan dela petrolioa eskuratu dutena, Al Jazeerak jaso duenez. Petrolio hori energia bilakatu eta herritarrengana iristeko egunak beharko badira ere, portuan itsasontziaren iritsiera ospatu dute, Vicente de la O Levy Energia eta Meatzeen ministroak barne. Ministroa eskertuta azaldu da: "Eskerrak eman nahi dizkiegu Errusiako Gobernuari eta herriari jasotzen ari garen babes guztiarengatik. Balio handiko bidalketa da, egoera energetiko konplexuan gauden honetan iritsi dena". Zenbait adituk azpimarratu dute herrialdearen kontsumo beharrak hiru aste eta hilabete artean asetzeko balioko duela bidalketak.

Donald Trumpen kontraesanak

Kuban sufritzen ari diren energia eskasiak ospitaleak, garraio publikoa eta nekazaritza ia kolapsora eraman ditu. Etengabeko itzalaldiak eragiteaz gain, janariaren eta medikamenduaren falta ekarri du. Irla azken hamarkadetako unerik zailenetakoan murgilduta dago.

Urtarrilaz geroztik ez da petroliorik sartu Kubako badian, AEBetako armada Venezuelan sartu eta Nicolas Maduro bahitu zutenetik. Venezuela izan da orain arte Kubako petrolio esportatzaile nagusia. Blokeo energetikoa ezarri arren, Trumpek orain dio "arrazoi humanitarioak" direla eta herrialde batek Kubari petrolio bidezko laguntza eman nahi badio, "ez daukala ezer horren kontra" adierazi du AEBetako presidenteak.