Kaleratzeak STOP plataformak iragan astean jakinarazi zuen Errenteriako familia batek –adin txikiko bat tarteko– etxegabetze agindua jaso zuela, ostegun honetan gauzatzekoa. CaixaBankek etxegabetu behar zuen familia, baina akordio batera heldu dira bi aldeak, Errenteriako alkate Aizpea Otaegi Mitxelenaren bitartekaritzarekin. Adostu dute familiak bere zorraren zati bat ordaindu, eta alokairu sozialeko kontratu berri bat sinatzea. Hala, familia ez da kale gorrian geratuko. 

Plataformak salatu du gaur egun etxebizitza eskubidea “larrialdi maila gorrian” dagoela, besteak beste, “PP, VOX eta JUNTSen erruz" Kongresuan etxegabetzeen aurkako ezkutu soziala desagerrarazi zutelako. Gaineratu dute, horrek jabeei bidea irekitzen diela familia zaurgarriak kaleratu ahal izateko. Testuinguru horretan, plataformak azpimarratu nahi izan du finantza erakundeak administrazio publikoekin “aktiboki lankidetzan aritu behar” direla. Izan ere, soilik EAEn, 65.594 etxebizitza kontratu amaituko dira aurten.