Errenta aitorpena egiteko garaian gaude. Batzuk egina jasoko dute, besteek osatu egin beharko dute. Era batean edo bestean izan, norberaren zergak nora bidera daitezkeen erabaki daiteke. Horretarako, hiru aukera izaten dira: Eliza Katolikora bidera daiteke, helburu sozialetara edo bietara. Gobernuz kanpoko erakundeek eta 170 entitate sozialek dei egin diete herritarrei helburu sozialen laukitxoa markatzera. Horrek bideratuko baitu errenta aitorpenen 0,7a gizartean zaurgarrien dauden herritarrak laguntzera: gizarte ekintzetara, garapenerako nazioarteko lankidetzara edota adinekoekin lanean ari diren entitateetara, adibidez.

Errenta aitorpena egiten duten pertsona fisikoen %47k hautatzen du helburu sozialetara bideratzea euren zergen zatia. Gazteen artean, zenbaitetan hutsik uzten dute atal hori. Ezjakintasuna izan daiteke, edo ez, baina dei berezia egin diete 25 eta 35 urteko gazteei. Eta ez bakarrik norbanakoei, enpresei ere galdegin die. Enpresen bidez 4 milioi euro gehiago jaso ahalko liratekeela uste dute. 2010an bost milioi euro bideratu ziren helburu sozialen laukitxoari esker 500 proiektu baino gehiago garatzera, orain ia 14 milioi euro dira biltzen direnak. Entitateek argi dute pobrezia murrizteko eta aukera berdintasuna ziurtatzeko baliagarria da helburu sozialen laukitxoa markatzea.