Lehen mailako arretan errehabilitazioa online eta aurrez aurre egiteko zerbitzu bat abiatu du Osakidetzak. Momentuz, sorbaldako, lunbarretako eta lepoko patologia duten pazienteak izanen dira zerbitzu hibridoa probatzen duten lehenak. Proiektu pilotu bat da, eta asmoa Osakidetza osora zabaltzea da. Horretarako, datozen hilabeteetan, besteak beste, erabiltzaileen gogobetetzea, eraginkortasuna eta kalitatea aztertuko dituzte.

Zerbitzu berria probatzen ari diren pazienteek orain arte aurrez aurreko hamabi talde saio zituzten. Sei eta zortzi aste arteko epean jasotzen zuten errehabilitazioa. Bertan, berreskuratzeko, indartzeko eta mina kontrolatzeko ariketa terapeutikoak egiten zituzten. Osakidetzak jakinarazi duenez, kasu askotan terapiak “laburragoak” izaten dira, “oso zaila” delako erabiltzaileen eguneko ardurekin uztartzea. Programa berriaren bidez, aurrez aurreko zortzi saio eta sei asteko online jarduerak izanen dituzte. “Proiektuari esker plan terapeutikoak egokiagoak, erosoagoak eta malguagoak izango dira. Horrez gain, Osakidetzako fisioterapeuten jarraipen profesionala izanen dute errekuperazio-prozesua eraginkorra izan dadin”, esan du Osakidetzak.

Neurria Eusko Jaurlaritzako Osasun Sailak Euskadiko Osasun Itunean hartutako konpromisoen barruan kokatzen da. Itunak Osakidetzaren “eraldaketa digitala” eta osasun arreta “berritzeko” ardura nabarmentzen du. Xedea da arreta “hurbilagoa”, “ekitatiboagoa” eta “efizienteagoa” izatea. Osakidetzaren arabera, proiektuak tratamenduarekiko atxikimendua “hobetu”, eta jarraikortasun asistentziala “bermatzen” du. Horrekin batera, “alferrikako” joan-etorriak saihesten ditu.