Ekainaren hasieran absolbitu zituzten Zestoako (Gipuzkoa) auzian epaitutako sei lagunak. Zestoako Mugimendu Feministaren aburuz, indarkeria matxistaren biktima zen emakume bat eta bera babesten aritutako bost pertsonak –tartean, Zestoako alkate Mikel Arregi– "elkartasun feminista" gauzatzeagatik epaituak izan ziren, lehenaren bikotekide ohiak 2018an haren “integritate moralaren aurkako” delitua salatu ondoren. 

Epaileak haren erabakiaren berri eman eta bost hilabetera, urriaren 17an, Zestoan Elkartasuna plazara jaialdia egingo dutela jakinarazi du herriko talde feministak. Izan ere, prozedura judizialaren ondorioak oraindik ez direla amaitu salatu dute, sei akusatuentzat "minaz eta sufrimenduaz" gain, 30.000 eurotik gorako kostua ekarri baititu: "Bidegabea izan zen haien kontrako makroepaiketa, eta bidegabekeria da horri guztiari halako zama ekonomikoa gehitzea".

Antolatzaileen esanetan, bi helburu nagusi izango ditu jaialdiak: epaiketak akusatuei ekarritako kostua ordaintzeko dirua biltzea, eta "elkartasun feministak irabazi" duela ospatzea eta aldarrikatzea.

Egitaraua

Zestoako Mugimendu Feministak azpimarratu du herriko nahiz inguruko eragileen eta herritarren laguntza "ezinbestekoa" izan dela jaialdia antolatzeko, eta garrantzia eman die egitarauean izango diren musikariei eta bertsolariei, "erakutsitako konpromisoagatik eta elkartasun feminista aldarrikatzeko jaialdian izateko egingo duten ahaleginagatik".

Goizeko 12etan ongi etorria egin ondoren, Onintza Enbeitak eta Uxue Alberdik bertso saioa eskainiko dute. 13etan Le Big Gibel taldeak poteoa girotuko du, eta 14:30etan herri bazkaria izango dute. Eguna amaitzeko, 17:00etan hasita zenbait kontzertu izango dituzte: besteak beste, Rodeo eta familia, Aizpea, Ke Lepo, Sara Sozaya eta Ines Osinaga. Bazkarirako txartela erosteko azken eguna urriaren 12a da, eta honako leku hauetan daude salgai: Zestoako Ogi Berrin eta Portalen; Azpeitiako Orkatzen eta Nizan; Zumaiako Emakumeon* Etxean; eta Zarauzko Arranon.

Kasuaren nondik norakoak

Zazpi urteko prozesuaren ostean, iazko abenduan Donostiako Auzitegian epaiketa izan zuten sei akusatuek, gizonak lau eta bost urteko espetxe zigorrak eskatzen baitzizkien haren bikotekide ohiari eta emakumeari "denbora luzez une jakinetan nahiz modu jarraituan" babestu zuten beste bostei. Azkenean, epaileak ekainean ebatzi zuen ez zela inolako deliturik gertatu. 

"Berri pozgarria da, ezinbestekoa zauriak ixten hasteko", nabarmendu du Zestoako Mugimendu Feministak. Haien aburuz, sei lagunen aurkako prozedura judiziala abiatu izanak ez du "inolako justifikaziorik", eta zazpi urteko "prozesu latza" bizi behar izan dute: "Sufrimenduz, nekez eta ziurgabetasunez betetako prozesua".