Honengatik saritu du ARGIAk Antxeta irratia:

"Bizi ditugun garai hauek kazetaritza ausarta behar dute, ardi-larruz jantzitako otsoei mozorroa kentzeko gai den kazetaritza, eskuin muturrak hauspoturiko diskurtsoei aurre egiten diena.

Segurtasunaren izenean kaleak patruilatzea helburu omen zuen hiritar taldearen benetako izaera azaleratu du gaurko gure sarituak: taldearen barrunbeetan sartu da eta agerian utzi du delituak prebenitzearen aitzakian, islamofobia, xenofobia eta gorrotorako bazka ezkutatzen direla bertan. Inguruko txoko guztietara iritsi da oihartzuna. Are gehiago, fenomeno horren aurrean beste alde batera begiratzea hautatu zuten erakunde publikoak ere interpelatu ditu irrati honek.

Azken finean, bere ohiko programazioan espazio eta denbora ez gutxi eskaintzen dizkie anti-arrazakeriari eta kulturaniztasunari, bai Irun-Hondarribia eta Hendaia batzen dituen ekosistema berezian, bai Bortzirietan".

Antxeta irratiko Aimar Lopez eta Koldo Nausia kazetariek azpimarratu dute tokiko hedabideen garrantzia eskuin muturraren aurrean: “Beldurraren diskurtsoaren laborategiak dira auzo-patruilak; tokiko kazetariei dagokigu alarma gorria piztea, herritarrak informatuta”.