Maiatzaren 30ean, larunbatarekin, Stop Fosilak elkarteak antolatuta energia burujabetzari buruzko jardunaldia egingo dute Hernaniko Biteri Kultur Etxean, 10:00etatik 13:00era, Euskal Herria energia burujabetzarantz izenarekin.

Jardunaldian zientzia munduko hainbat lagun ariko dira hizlari, energia gaietan adituak direnak. Instituto Meridianoko José Luis Rodriguezek energiaren geopolitikari buruz hitz egingo du; Europan energia murrizteko Clever proiektuko eta négaWatt elkarteko Nicolas Taillardek, "nahikotasun berriztagarriaren" modelizazio posible bat aurkeztuko du; Stop Fosilakeko Gorka Laurnagak eta Lorea Floresek, berriz, trantsizio energetiko justu eta "azkarra" izango dute hizketagai; eta azkenik, Juan Requejo lurralde plangintzan adituak "Berriztagarrien hedapen justua" hitzaldia eskainiko du. Hitzaldietarako itzulpen zerbitzua egongo dela adierazi dute antolatzaileek.

Stop Fosilak elkartea duela hilabete batzuk aurkeztu zuten. Klima larrialdiaren aurrean, desazkundea ez dela nahikoa diote, eta berriztagarrien hedapena beharrezkoa dela defendatzen dute, tartean zentral eolikoak eta fotovoltaikoak. Dozenaka pertsonek sinatu zuten manifestua.