Milaka herritar irten da kalera asteburuan Tayyip Erdoganen gobernuaren erabakiaren aurka. Emakumeen indarkeriaren aurkako Istanbulgo Ituna Turkiako hiriburuan sinatu zen 2011n.
Manifestaziorik jendetsuenak Istanbulekoak izan dira, prentsa agentzien arabera. Indarkeria matxistaren aurka borrokatzen duten elkarteek salatzen dutenez azken hamarkadan emakumeen hilketa matxistak hirukoiztu egin dira Turkian, eta urtean 300 inguru izaten dira hildako emakumeak.
Familia “balioen” alde, homosexualitatearen kontra
Tayyip Erdogan presidenteak sinatu du Turkia itunetik kanpo uzten duen dekretua, legebiltzarretik pasa gabe. Turkiako Gobernuaren arabera, “ Istanbulgo Ituna, hasieran emakumea babesteko pentsatuta zegoena, homosexualitatea normaltzen saiatzen ari den jende talde batek bahitu du, eta hori Turkiaren gizarte eta familia balioen kontrakoa da”.
Istanbulgo Ituna Europako Kontseiluak bultzatu zuen, eta 2011n sinatu zuten lehenbizikoz hamalau estatuk Istanbul hirian. Turkia Europa Batasunetik kanpoko estreinako sinatzailea izan zen. Nazio Batuen Erakundea Turkiako Gobernuaren erabakiaren aurka azaldu da. Itunetik irtetea “atzeraka” dela eta Turkiako emakumeak “arriskuan” jartzen dituela adierazi du Europako Kontseiluko idazkari nagusi Marija Pejcinovic Buricek.