Eusko Jaurlaritzaren Segurtasun Sailak jakinarazi duenez, erasoa bart gauean gertatu da Ibaeta auzoan, eta emakumeak salaketa jarri du. Ertzaintzak abian jarri du ikerketa gertatutakoa argitzeko eta egilea edo egileak identifikatzeko.

Irutxuloko Hitzak jaso duenez, Donostiako Udaleko Bozeramaileen Batzordeak adierazpen instituzionala egin du, eta erasoa “gogor” gaitzesteaz gain, biktimari eta inguruari elkartasuna adierazi dio. Emakumeari “behar duen informazioa eta udal baliabideak” eskainiko dizkiotela jakinarazi du udalak, eta premiazko bilera deitu du informazioa egiaztatzeko eta erakundeek erantzuna eta arreta koordinatzeko. Adierazpenean azaldu dute “halako erasoak gure gizartean oraindik ere badagoen indarkeria matxistaren eta sexualaren adierazpen” direla.