Granadan, Sierra Nevadako Parke Nazionalean dagoen eski estazioak kanoi bidez jaurtitako elur artifizialarekin funtzionatzen du batik bat aspaldiko urteotan, beste estazio askok bezala. Elur natural faltari aurre egiteko ura erauzten dute Monachil errekatik, eta izoztu ondoren elur bihurtu. Orain, ur kopuru bikoitza erauzteko aukera eduki dezake, urtean 350.000 metro kubotik 671.260 metro kubora. 

Duela bi urte egin zion eskaria estazioa kudeatzen duen Cetursa enpresak Guadalquivirreko Konfederazio Hidrografikoari. Horrek atzera bota zuen, Andaluziako Juntaren ingurumen baimenik ez zuelako, baina berriki baimen hori eman dio juntak eta bidea ireki dio egitasmoari.

Sierra Nevadakoa Europako hegoaldeen dagoen eski estazioa da, eta nahiz eta garaiera handikoa izan –Mulhacen mendia (3.479 m) Iberiar penintsulako garaiena da– aldaketa klimatikoaren ondorioz elur falta gehien nozitu duenetako bat da. Estazioko arduradunek esan dute "behar gorria" dutela Monachiletik ur gehiago erauzteko, euren negozioaren errentagarritasuna bermatu aldera, noski. Horri lotuta, gainera, Monachilgo Udalak ere errekatik ur gehiago ateratzea eskatu du, eski-turismora emana dagoen Pradollano urbanizazioa hornitzeko.

Ekologistek alarma jo dute, ingurumen kalte handia eragingo lukeelako. Sierra Nevadako Aldaketa Globalaren Behatokiak emandako datuen arabera, mendikatean 1993tik 2023ra bitartean %68 euri gutxiago egin du, eta hori asko nabaritu da magaletatik behera doazen erreketan. Adibidez, azken urteetan ohikoa da uda sasoian Monachil erreka erabat idortuta aurkitzea Granada hiriburutik pasatzerakoan. 

Elur guztia ez denean ur bihurtzen

Granada eta Almeria artean geografikoki isolatuta dagoen mendikateak balio handiko landaretza eta fauna biodibertsitatea biltzen du bere orografia eta hidrografiagatik, eta desagertzeko arriskuan dauden espezie endemiko ugari bizi dira bertan. Ecologistas en Acciónen arabera, ekosistema hori arriskuan legoke oreka hidrografikoa apurtuz gero. 

Baina arduradun politikoek gisa honetako baieztapenak egin dituzte: "[Estazioarentzat] ur gehiago behar da, elur bihurtu eta ondoren berriz urtuta itzuliko dena. Ez dago inpakturik". Juan Manuel Moreno Bonilla Andaluziako Juntako presidentearen hitzak dira. Adituek berehala gezurtatu dute mandataria: elurraren zati bat, %20 inguru, ez da urtzen baizik eta "sublimatu" egiten da, alegia, atmosferan lurrunduta galtzen da.

Bestalde, ura "noiz eta non" erauzten den ere garrantzitsua da: goiko arroetatik ura ateraz gero, beheko arroetan egiten da kaltea, eta ez da segurua udaberrian ura behealde horretatik igaroko denik.

Bitartean, Pradollanotik gora doazen maldetan 427 elur-kanoi martxan dira, estazioaren 45 pistak zuri-zuri mantentzeko; Espainiako Estatuko sare artifizial handienetako bat osatzen dute. Larrialdi klimatikoari ezikusia egiten dion "aurrera ihes" bat dela diote ekologistek.