Eibarko Udalaren aurkako epaia aurkeztu du Gipuzkoako administrazioarekiko auziekiko auzitegi batek. Udaltzaina izateko eskatzen den euskara maila –C1 maila– "neurrigabea" dela argudiatuta, ebazpen judizialak ezeztatu egin du Eibarko udaltzaingo izateko prozesuan zeuden sei postuk eskatzen zuten derrigorrezko hizkuntza eskakizuna. 

B2 maila duten hiru udaltzainek auzitara jo zuten eta helegiteak aurkeztu zituzten udaltzainak aukeratzeko deialdiaren aurka, baita hautatuak izan ziren eta izan ez zirenen zerrendaren aurka ere. Sententziak jasotzen du Eibarko Udalak hizkuntza eskakizun horrekin enplegu publikorako sarbidea baldintzatzen duela, ez baitu bermatzen "hizkuntzarengatik inor baztertu gabe" uztea.

Udalean euskara derrigorrez jakin behar dutenen ehunekoa %63,1ekoa da. Bada, datuak aurkeztu dituzte ehuneko hori jada gainditzen dela frogatzeko: dauden 275 lanpostuetatik 206tan euskara derrigorrezkoa da, hau da, postuen %74. 

Gainera, sententzian jaso dute aztertu dituzten udaltzain postu gehienen jarduera "gehienetan barrukoa" dela. Arrazoi hori da aurkeztutako argudioetako bat, azpimarratuz guztiei hizkuntza eskakizuna eskatzea desegokia dela. 

Erreforma baten zain

Euskal Enplegu Publikoaren erreforma eztabaidatzen ari den honetan iritsi da epaia. Erreforma baten beharrean dago Eusko Legebiltzarra, orain arte aurkeztu diren hizkuntza eskakizunen aurkako helegiteek kolokan jarri baitute lanpostu publikoetan euskara sustatzeko eta bermatzeko ezarritako baldintzak.

Une honetan bi erreforma proposamena daude mahairen gainean: EAJrena eta EH Bildurena. EAJrenak egungo derrigorrezko hizkuntza eskaera orokorra ezabatzea proposatzen du. EH Bildurenak, berriz, lanpostu publiko guztietara zabaltzea hizkuntza eskakizunak egiaztatzeko derrigortasuna.

Orain arte EAJ PSE-EErekin aritu da negoziazioetan, baina ez dute lortu akordio batera iristerik. Ordea, jatorrizko erreforma proposamenei buruzko lan taldean berriki EH Bilduk EAJrekin "negoziazioetan" jarraitzeko mugimendua egin du. Zehazteke dago oraindik nora iritsiko diren negoziazioak.