Esan eta egin; hamar urte eta gero, berriro egin dute sokamuturra Eibarko sanjoanetan. Igandean egin dute lehen saioa, goizeko zortzietan, Untzaga plazan. Jendetza bildu da plazan eta gehienbat gazteak aritu dira hesien barruan. Saka ganadutegiko bost zezen askatu dituzte. Ekainaren 24an eta 25ean berriro egingo dute. 

Ez da gorabeherarik izan, baina tentsioa egon da. Sokamuturra ikustera edo bertan parte hartzera joandakoak ez dira plazan bildutako bakarrak izan. Hasteko minutu gutxiren faltan, Eibarko Sokamuturra Ez taldeak deituta, hogei bat pertsonak protesta egin dute sokamuturraren aurka. 

Polemika herrian

Eibarko Udalaren ekimenez itzuli da sokamuturra jaietako egitaraura. Herriko alkate Jon Iraolak (PSE) alde bakarrez erabaki zuen jarduera itzultzea, "gazteek hala eskatuta". Erabakiak polemika sortu zuen herrian, eta animalien aldeko kolektiboek bertan behera uzteko eskatu zuten.

Pasa den ostegunean herriko alderdiek bertan behera uzteko mozioa aurkeztu zuten, baina soilik Elkarrekin Ahal Dugu-k babestu zuen. Horren ordez, EAJk aurkeztutakoa onartu zuten: etorkizunean sokamuturra egin ala ez herritarren eta alderdien artean eztabaidatzea.