Doakotasunaren aldeko proposamena euskara bizitzen ari den “geldoaldi fasean” kokatu du Josu Aztiriak martxoaren 12ko agerraldian. Geldoalditik indarberritzera jauzi egiteko hizkuntza politika publiko ausartak eskatu ditu, eta hizkuntza politika horien muinean hizkuntza gaitasuna eta ezagutza unibertsalizatzea ipini du, alegia, euskara “ahalik eta herritar gehienengana” iristea. Erronka hori lortzeko bide moduan proposatu du doakotasuna. Eusko Jaurlaritzari eskatu dio A1etik hasi eta B2 mailara arte doakotasuna “erabatekoa” izatea. B1 2026-2027 ikasturtean garatzea proposatzen du eta B2 hurrengo ikasturtean. Doakotasun erabatekoarekin adierazi nahi du ikasturte hasieran matrikulari dagokion dirua aurreratu behar izatea eta diru hori jasotzeko ikas maila gainditzeko derrigortasuna ere ez izatea. Gaur egun, maila guztietan dirua aurreratzen da eskolak jasotzeko, eta hainbat baldintza betez gero diru hori itzultzeko aukera dago.

Aztiriak bigarren proposamen bat ere jarri du mahai gainean. Administrazio publikoak azpikontratatzen dituen enpresetako langileak euskara ikas dezaten neurriak hartzea galdegin du, hala, zerbitzu publikoa ematen duten langileek lanorduetan euskara ikasi ahal izatea proposatu du; administrazio publikoko langileekin egiten den bezala.

Hirugarrenik, “prekarizazio handiena duten” sektoreak aipatu ditu, adibidez zaintza eremua. Laguntzak eskatu ditu sektore horietako langileak liberatzeko eta ordezkatzeko.

EAJ eta PSE-EEk oraingo planari eutsi diote

Alaitz Zabala EAJko legebiltzarkidea doakotasunaren bidean pausoak ematearen alde agertu da, baina ez du EH Bilduren proposamenaren alde egin. PSE-EErekin batera, gobernuak gaur egun daukan planari jarraitzea hobetsi du. Pau Blasi PSE-EEko eledunak ildo beretik jo du. Jon Hernández Sumarreko ordezkariak baiezkoa eman dio EH Bilduren proposamenari, baita EAJren eta PSE-EEren zuzenketei ere.