Ipar globalak alarmak piztu ditu Italian ustezko ebola bi kasu atzeman direlako, baina KED Kongoko Errepublika Demokratikoan dagoeneko larrialdia etxean dute. Herrialdeko Osasun Ministerioak larunbatean zabaldu zituen datuen arabera, dagoeneko 101 kutsatu eta beste 930 susmagarri daude. Datu larriena, baina, hildakoena da: 221 zenbatu ditu Kongoko Gobernuak.

Ebolaren egungo agerraldia maiatzaren 15ean deklaratu zuen gobernuak Ituri probintzian, herrialdearen ipar-ekialdean, eta ebolaren Bundibugyo aldaerarekin bat dator. Haren hilkortasun-tasa % 30 eta % 50 artekoa da, eta oraingoz ez dago baimendutako txertorik edo tratamendu espezifikorik, Osasunaren Mundu Erakundearen arabera. Astelehenean umiltasun eta zintzotasunez mintzatu da horren inguruan Tedros Adhanom Ghebreyesus OMEko zuzendari nagusia: "Gaindituta sentitzen gara (...) Oso azkar zabaltzen den epidemia batekin eguneratzen saiatzen ari gara "

Gaixotasunari aurre egiteko baldintzak ez dira mesedegarriak, aipatutako arriskuez gain, herrialdea ezegonkortasun politiko betean baitago. Izan ere, Ituri eskualdean lau pertsonatik batek laguntza humanitarioa behar du eta bostetik bat herrialdeko beste puntu batzuetatik ihesi iritsitakoa da. Are, bertako osasun-sistema “ahula” dela azpimarratu du Ghebreyesusek.

Oraingoz gaixotasunari aurre egiteko txertorik ez badago ere, nazioarteko komunitate zientifikoa irtenbide bila ari da buru-belarri, txerto eta terapia berrien bila. OMEk jakinarazi duenez, bizkortu egin dute txertoen eta tratamenduen bilaketa, azken urteetan Afrika erdialdean erregistratutako agerraldi kezkagarrienetako bati aurre egiteko asmoarekin.