EAko sektore batek primarioak eskatu ditu hurrengo idazkari nagusia aukeratzeko

  • Eusko Alkartasunaren zuzendaritzarekin desadostasunak dituen sektore batek idazkari nagusia aukeratzeko hauteskundeak, alderdiko liberatuen hautaketa irekia eta bi agintaldiko muga defendatu dute.

Lukas Barandiaran San Roman
2017ko maiatzaren 08a
Agerraldiaren irudia. (Arg.: Alkartasuna2017)

EAko 30 militante inguruk agerraldia egin dute Bilbon; horien artean Maiorga Ramirez Nafarroako legebiltzarkidea eta Unai Ziarreta alderdiko lehendakari ohia. “Alkartasuna 2017” dokumentuan aurkeztu dituzte beren eskariak eta adierazi dute “ehunka” militantek babesten dutela dokumentu hori, baina aldaketak izan ditzakeela militanteek egingo dituzten ekarpenekin.

Iratxe Lopez de Aberasturi Gasteizko zinegotziak hitz egin du kolektiboaren izenean, eta EAn “ziklo berria” aldarrikatuta, “gardentasuna, parte-hartzea eta barne demokrazia” eskatu dituzte. EH Bildu koalizioari buruzko erabakietan ikusi dute batez ere gabezia hori. Aipatutako neurriez gain —idazkari nagusi eta liberatuen hautaketa eta bi agintaldiko muga—, EH Bilduko zerrendetan parte hartuko duten EAko hautagaiak izendatzeko lurraldekako zerrenda irekiak osatzea eta erabaki “esanguratsuak” hartzeko militanteei kontsulta egitea eskatu dute.

Dena den, Lopez de Aberasturik azpimarratu egin du EH Bildurekin duten konpromiso garbia, defendatu baitu “gehiengo subirano eta ezkertiarra” osatzeko tresna bakarra dela.

Agerraldia EAko kongresua baino hilabete lehenago egin dute, ekainaren 3 eta 4an izango baita. Hain zuzen, kongresuko epeak kontuan hartzeko eskatu diote EH Bilduri.

ARGIAn egiten dugun kazetaritza independenteak bultzada merezi duela uste duzu?

Informazio askea lantzen dugu ARGIAn, langileok gara proiektuaren jabeak eta gure informazioen atzean ez duzu sekula multinazionalik, bankurik edo alderdi politikorik topatuko. Gure ustez, burujabetza guztien oinarrian dago informazio burujabetza, ezagutzen dugunaren gainean pentsatzen eta erabakitzen dugu. Horregatik diogu kazetaritza independentea dela demokraziaren oinarrietako bat.

Aldizkaria paperean etxean edo e-postan PDFan jaso nahi duzu? Pozik hartuko zaitugu ARGIAko komunitatean. ARGIAkoa izateko, nahi eta ahal duzun ekarpena egin dezakezu, eta bueltan egoki ikusten duzuna eskatu. Indartu dezagun indartzen gaituena!

Kanal honetan artxibatua: EA

EA kanaletik interesatuko zaizu...
Azkenak
EGILEA
Eguneraketa berriak daude