Aieten (Donostia) kokatzen den La Cumbre jauregia Memoria Zentro bilakatzeko urrats berria jakinarazi du Donostiako Udalak. Donostiako Udalak “iraganeko gertaerak gogorarazteko” eta “giza eskubideen aldeko pedagogia egiteko” gunea izango dela adierazi du, Irutxuloko Hitzak jaso duenez. Hain zuzen ere, eraikinak balio sinbolikoa du, bertan Lasa eta Zabala atxilotuak eta torturatuak izan zirelako Busoten (Alikante) exekutatu eta lurperatuak izan aurretik. Eduki eta erabilera zehatza beste erakunde batzuekin batera adosteko asmoa du udalak.

2022an hasi zen La Cumbre jauregia Espainiako Gobernuaren eskuetatik Donostiako Udalarena izatera igarotzeko eskakizuna, Espainiako Memoria Demokratikorako Legea onartzeko negoziazioen ostean. Egindako eskakizun eta emandako urratsen ondoren ekin zaio Jauregia behin betiko Udalaren esku uzteko azken faseari. EH Bildu baikor azaldu da “aurrerapen” gisa ikusten duelako, eta “biktimen erreparazioa bermatzeko bidea”, Naizek jaso duenez. “Urte luzez isildua eta ukatuta egon den errealitateari leihoa ireki” zaiola azaldu du EH Bilduk, “estatuaren biktimei” aitortza egiteko bidea baita.