Epailearen aurkako jazarpenak oihartzun handia izan du, hedabideetan bobo-bolo zabaldu da, Donosti Cup-ek gertatutakoak gaitzetsi ditu, baita Jaurlaritzaren Segurtasun Sailak eta Esan Ertzainen sindikatuak ere, "bizikidetzaren aurkakoak" direlako. Eta, Donostiako Axular lizeoak "barkamena" eskatu du. Izan ere, pasa den ostiralean Saint Orens B talde frantziarraren eta Axular -ren arteko jubenil mailako partidan gertatu ziren joko-eremutik at salto egin duten gertaerak. Segurtasun Sailak jakinarazi duenez, Axularreko jokalariak hasieratik oldartu zitzaizkion epaileari. Une batean, inguruan zeuzkan jokalariei urruntzeko eskatu zien, eta zenbait ikusle futbol zelaira sartu eta  epailearengana hurbildu ziren orduan. Horren aurrean, segurtasun arduradunek babestuta zelaia utzi behar izan zuen epaileak, Ertzain izatearekin lotutako irainen artean, Segurtasun Sailak jakinarazi duenez.

Larunbatean, bestalde, 10 eta 11 urteko umeen partida batean (Elitec espainiarra vs Las Vegas estatubatuarra), bi taldeetako gurasoak euren artean borrokan hasi ziren, eta bi pertsona zauritu ziren –haietako bat anbulantzian eraman zuten–. Partidak, baina, jarraitu egin zuen, guraso talde biak elkar banandu ostean. Banatzea baino borrokan aritu zirenak futbol zelaitik kanporatzea egokiagoa litzatekeela pentsatuko du norbaitek, eta Zubietan gertatutakoen inguruan, antzera, zeren eta horrelakoetan ohartarazpenak egin bai baina zigorrak jartzen ez badira... Astebururo ikusten dugu, bateko ala besteko futbol zelaietan liskarrak daudela, "sentitzen dugu", "barkamena eskatzen dugu" eta "horrelakoak gehiago gertatu ez daitezen neurriak hartuko ditugu" adierazpenak adierazpen.

Donosti Cup-ek badu Hitzezko Indarkeriaren aurkako protokoloa. Pentsatzekoa da, gurasoen arteko borrokari dagokionez, behin bananduta lasaitu egingo zirela, bestelakoan neurri zorrotzagoak hartuko lirateke-eta.