Joan den irailean Corellako guraso talde batek salatu zuen, Ciudad de Corella Haur eta Lehen Hezkuntzako Ikastetxe Publikoko 11 familiek D ereduko lerroa irekitzeko eskaera egin zutela Hezkuntza Departamentuan. Horrek ezezkoa eman zien, eskaerak Nafarroako eskola mapa aldatzea zekarrela argudiatuta, horretarako protokolo zehatz bat jarri behar dutela martxan eta aurtengoan ezin zutela. Gomendioa izan zen egiteko berriz eskaera 2026-2027 ikasturterako.

Egin dute berriz eskaera gurasoek eta orain, salatu dutenez, ikastetxeko zuzendaritzatik datozkie trabak. Berria-k dioenez, familiek adierazi dute zentroko zuzendaritzatik esan zaiela D ereduan matrikulatuz gero “Corellatik kanpo” aterako beharko dutela ikastera.

Hori ez dela egia zehaztu dute familiek eta uste dute gisa horretako mezuekin ikastetxeko zuzendaritzak mezu okerrak zabaltzen dituela. Salatu dute, halaber, zuzendaritza horrek ez diela D ereduaren gaineko informaziorik ematen guraso immigratzaileei.

Jesús Rodríguez Hernández da zentroko zuzendaria, UPNko militantea eta alderdi horretako zinegotzi ohia Corellako Udalean. Familiek salatzen dutenez, Rodriguezek “bere ideologia politikoaren zerbitzura” jarri du ikastetxeko zuzendaritza. Corellako hainbat herritarrek, halaber, salatu dute Alhama Bigarren Hezkuntzako Institutuan ere trabak izan direla aurtengo ikasturtean A eredua lerro bat irekitzeko.

Ez dira berriak Nafarroako euskaldunek euskarazko lerroak irekitzeko dituzten zailtasunak. Corellako kasuari begira, adibidez, sektore euskaltzaleek diote Hezkuntza Departamentuak aitzaki gisa erabiltzen duela eskola maparena, berez ez legokeelako inongo arazorik egon behar lehenik D ereduko lerroa irekitzeko eta gero eskola mapa aldatzeko.