Eurostatek egindako ikerketak agerian utzi du Europa mailan biolentzia sexualeko kasuak %94 igo direla 2014az geroztik, 124.350 kasu gehiagorekin. Bortxaketak, berriz, %150 igo dira, 58.983 kasu gehiagorekin. Orotara 2024. urtean 256.302 biolentzia sexual eta bortxaketa kasu jaso zituzten poliziek.

2023ko datuekin alderatuta, 2024an biolentzia sexualeko kasuak %5 igo dira, 12.087 pertsona gehiagok pairatu dituzte, eta bortxaketak %7 igo dira, 6.291 kasu gehiagorekin. Hortaz, orotara azken hamarkadan urtero %10 egin hazi dira biolentzia sexualaren kasuak eta %7 bortxaketak. 2024ean kasu gehien erregistratutako herrialdeen artean, Frantzia, Alemania, Suedia eta Espainia topatzen dira.

Eurostatek azaldu du gizartean eman den kontzientziazioak kasu gehiago erregistratzea eragin dezakeela. Kontutan izan behar da, aldi berean, eman diren eraso guztiak ez direla zertan erregistratuak izan eta kasu gehiago egon daitezkeela.

Espainiako eta Frantziako estatuak

Espainiako Estatuan erregistratutako biolentzia sexualeko kasuak gora egin dute azken hamarkadan –nahiz eta 2015 eta 2020 urteetan behera egin zuten–. 2024an, 2014an baino 12.159 kasu gehiago erregistratu dira, 19.655 orotara. Bortxaketen kasuan, berriz, datuek gora egin dute, 2020a salbuespen. 2024an, 2014an baino 3.983 bortxaketa gehiago erregistratu dira, guztira 5.222.

Frantziako Estatuan eraso kopurua gora egin du urtez urte, eta alde handiarekin gainerako herrialdeen gainetik kokatzen da. Biolentzia sexualari dagokionez, 2024 urtean 2014an baino 65.695 kasu gehiago jaso dituzte, zehazki 96.654. Bortxaketei dagokionez, 2024an 45.288 erregistratu dituzte, 2014an baino 33.131 kasu gehiago.