Norgehiagokari ekin aurretik ere, gatazka piztuta zegoen dagoeneko: etxeko talde gisa jokatzen bazuten ere, norgehiagoka Hungariako Debrecen hirian izatea erabaki zuen Irlandako Futbol Federazioak, herrialdetik 2.000 kilometro baino gehiagora. Irlandar zaleek, #StopTheGame leloarekin abiatutako kanpainaren bitartez, federazioari behin eta berriz eskatu diote partida jokatzeari uko egiteko, Israelek kirola "palestinarren aurkako genodizioa zuritzeko" tresna gisa erabiltzen duela argudiatuta.

Zaleek eginiko presioa dela eta, jokalariek partida jokatzearen alde edo kontra bozkatu zuten: Irlandako Futbol Federazioaren buru David Courellen esanetan, zazpik bozkatu zuten aurka. Horietako bat, hain zuzen, Gavin Bazunu Ingalaterrako Bolton Wanderers taldeko atezaina izan zen. "Sinesmen sendoko pertsona naiz, eta, ahal dudan heinean, printzipioak dituena izaten saiatzen naiz", adierazi zuen.

Partida jokatzearen aldeko botoak gailendu ziren arren, deialditik atera eta israeldarren aurka lehiatzeari uko egin zion Bazunuk. "Pertsona errugabeak hiltzea gaizki dago, baina nire erabakia ez doa herri israeldarraren zein komunitate judutarraren aurka, eremu horretan egiten ari diren sarraskien aurka baizik".

Burumakur eta besoko beltzarekin

Norgehiagokan zehar zenbait keinu egin zituzten Irlandako jokalariek: esaterako, protokoloa jarraituz partidari ekin aurretik zelaian Israelgo ereserkia jarri zutenean, irlandarrek burua makurtu zuten, eta hala egon ziren ereserkia amaitu arte. Bi selekzioetako kapitainen arteko zozketan, berriz, Dara O'Shea Irlandako kapitainak ez zion eskua eman Israelgo kapitain Manor Salomoni.

Irlandako jokalariek, besoko beltzarekin jokatu zuten norgehiagoka, Israelek Gazan hildako palestinarrekiko elkartasunez. Israeldarrei sartutako hirugarren gola besoko hori musukatuz ospatu zuen Jack Moylan golegileak. 

Israeldarren erreakzioak

Irlandako Futbol Federazioak hitzeman zuen ez zela partida ikusteko sarrerarik salduko; zenbait zale israeldar bertan izan ziren, ordea. Gainera, Adam Idah eta James Abankwah jokalari irlandarrek irain arrazistak oihukatu zizkietela salatu zuten.

Salomon kapitain israeldarrak, berriz, partida ostean eginiko adierazpenetan, adierazi zuen Irlandaren inguruan duen iritzia esanez gero, zenbait partida jokatzeko debekuarekin zigortuko luketela: "Gure herrialdea haiena baino hamar aldiz hobea da. Gure herrialdeaz eta soldaduez harro gaude". Israelgo Futbol Federazioak "ezjakintasuna, itxurakeria eta ergelkeria" leporatu zizkion Heimir Hallgrimsson Irlandako selekzioko entrenatzaileari; Hallgrimsonek partidaren aurretik esan zuen ez dutela "genozidioarekin jokatzen, haren aurka" baizik.