Bilboko Arriaga plazaren inguruan antzeman daiteke geroz eta gertuago dagoela Aste Nagusia. Konpartsak azken ukituak ematen ari dira eta beste batzuk Marijaia atontzen; orduak besterik ez dira falta festa lehertzeko Bilbon. Jai giroak bederatzi egunez kaleak hartu baino lehen, halere, Mugimendu Feministak agerraldia egin du ostegunean Arriaga plazan, gogoratzeko emakumeak eta disidentziak ere jaien parte direla, eta ez dela onartuko inolako erasorik. 

Jaietako antolatzaileak, konpartsakideak, dantzariak, musikariak... Mugimenduak azaldu du emakume zein disidentziak Aste Nagusiko "erdigune eta ertz guztietan" daudela, nahiz eta batzuek ikus nahi ez izan, dioenez. "Emakumeok, transok eta bollerok ezin dugu jai giroaz gizonezkoek bezain aske gozatu erasoen itzala beti baitugu gainean", salatu du, gogora ekarrita udan honetan Euskal Herrian izandako sexu erasoak. 

Gainera, oldarraldi erreakzionarioarekin, feministek nabarmendu dute erasoak salatzerakoan "diskurtso antifeminista, transfobo eta arrazistei" aurre egin behar dietela. Horregatik, txupinazorako orduak faltan, aldarrikatu dute Aste Nagusian ez dela inolako "eraso matxistarik, LGTBIfoborik eta arrazistarik" onartuko: "Emakumeen, transen, bolleren, emakume migratu edo arrazializatuen edota bestelako gorputz eta disidentzien kontrako erasoa gu guztion kontrako erasoa da".

Gauzak horrela, elkartasuna helarazi diote orain aste batzuk Bilboko Udaltzaingoak indarrez atxilotu zuen manteroari, gogoratuta "urtero-urtero Poliziaren hamaika eraso" jasan behar dituztela kaleko saltzaileek. 

Antolatu eta zaindu, baina gozatu ere bai

Sistema kapitalista, zisheteropatriarkal eta arrazistak "sortu eta betikotzen" dituen erasoen aurrean, argi esan du Mugimendu Feministak: "Antolakuntza eta autodefentsa feministaz erantzungo diegu". Emakume eta disidentziek "dagokien erdigunea" okupatzen jarraituko dutela adierazi du mugimenduak, eta hori egiteko, "elkar zaintzeaz gain", bidea oztopatzen duena geldiaraziko dutela. "Erasotzera zatozen hori, jaiak aske bizitzen uzten ez diguzun baboso hori, zure lagun matxiruloaren konplize zaren hori... Honezkero jakin beharko zenuke: Ez badakizu egoten ez etorri", aldarrikatu du.

Urteetan Bilboko Konpartsekin elkarlanean eraikitako sare eta aliantza feminista azpimarratu dute, eta aurten ere horretan jarraituko dutela iragarri. "Txosnaguneak, kontzertuak eta lagunartea gure egingo ditugu zaintzaz eta gozamenez, Aste Nagusia feministona ere badelako. Elkar zaindu, baina batez ere gozatu". 

Udalak eta konpartsak berriki jakinarazi dute protokolo feminista ezarri eta puntu moreak jarriko dituztela gune ezberdinetan, baita 24 orduko telefono zerbitzua ere, "eraso matxista, LGTBIfobo eta arrazistei aurre egiteko".