Errekalde auzoan beste gaztetxe bat hustu du Ertzaintzak astearte goizean. Larraskitu kalean zegoen eta Puxka kolektiboak kudeatzen zuen. Astearteko goizeko 9:00etan hasi eta bi orduan hustu dute eraikina, Eusko Jaurlaritzako Segurtasun Sailak jakinarazi duenaren arabera, ez da istilurik izan, baina espedientea ireki diote gazte bati eta beste bi identifikatu dituzte. Gutxienez Ertzaintzaren lau furgoneta bertaratu dira eraikinera, han zeuden gazteak atera eta goizeko 11:00etarako langileek atea itxi dute. Desalojoa salatzeko manifestazioa egin dute astearte arratsaldean.

Aipatu espedientea eta bi identifikazioak kanpoan zeuden gazteenak izan dira. Izan ere, gaztetxearen kanpoan dozena bat gazte inguru zeuden gaztetxeari “elkartasuna” adierazten. “Ekintza ez komunikatua” izan da gaztetxe kanpoan egindakoa, eta hori argudiatuta ireki dio gazte bati espedientea, Mozal Legea aplikatuta. Bide beretik joan dira beste bi identifikazioak.

Azaroan okupatu zuten eraikina Puxka kolektiboko kideek, “kaleak astintzeko eta alternatiba kultural, politiko eta sozioekonomikoak sortu eta garatzeko” asmoz. Kolektiboak salatu du orduan ere, azaro hasieran, Ertzaintzak eraikina hustu zuela, kolektiboaren aurkezpen egunean. Salatu dute orduko dispositiboa “gehiegizkoa” izan zela, eta Ertzaintzak mezu argia zuela: ez zuela espazio autogestionaturik baimenduko Errekalden.

Izan ere, apirilean beteko da urtebete Errekalden izandako azken istiluetatik: Etxarri II gaztetxea husten ari zirela, Iker Arana gazteari barrabiletan tiro egin zion Ertzaintzak, eta barrabiletako bat galdu zuen gazteak. Kasua epaitegietan dago eta berriki jakinarazi du Justizia Aranarentzat plataformak tiro egiteko agindua eman zuena deklaratzera deitzeko eskatu duela. Kasu horrez gain, Kukutza III gaztetxe ezagunaren hustuketa ere izan zen auzoan 2011n. Zenbait egunez izan ziren erresistentzian Ertzaintzak gaztetxea hustu zuenera arte: 31 lagun atxilotu zituzten.