BIDEOA | Korrikaren hasiera Atharratzen, 1985
Laugarren edizio hura 1985ean egin zen, maiatzaren 31tik ekainaren 9ra. Atharratzen hasi zen eta Iruñean amaitu, Herri bat, hizkuntza bat! lelopean. Piarres Lafitte izan zen urte hartako omendua. Maite Barnetxek zuzentzen zuen Eskual Herria orai eta gero magazineko irudiak dira, horregatik da euskaraz. Erreportajeak orotara 10 minutu inguru irauten du.
1985eko Korrikan Atharratzen lehen kilometroan lekukoa Zuberoako Langabetuen Batzordeko kide Jakes Agergaraik eraman zuen. Hasierako aurkezpena Amaia Fontangek egin zuen; telebistak elkarrizketatua Battitta Bordagarai da, Zuberoako Gau Eskolen ordezkaria; Korrikaren hasierako hitzaldia Julen Kaltzadak egin zuen, AEKren zuzendaritza nazionaleko kidea; Kaltzadaren hitzaldia biltzen mikroarekin Jojo Bidart ikus daiteke, Irulegi Irratiko kazetaria.
Lehen kilometroaren ondoren, Agergaraik lekukoa pasatu zion Basabürüko ikastolan irakasle ari zen Solange Chimixi. Bien lekukotasunak bildu ditu Kazeta-ko Oier Iriartek Langabetuek eta ikastolek Korrika abiatu zutenekoa erreportajean.
