Abenduan egindako greben bigarren fasea da oraingoa: Espainiako Estatuko medikuen dinamikaren barruan, Hego Euskal Herrikoak ere bi eguneko grebara daude deituta, Espainiako Osasun Ministerioak negoziatzeko hurbilketarik ez duela egin argudiatuta.

Ministerioa Osasun estatutua ari da negoziatzen, baina medikuek beren estatutu propioa nahi dute, eta otsailean greba mugagabera jotzeko aukera jarri dute mahai gainean, aurrerapausorik ez badago.

Eskaerak

Eskaera nagusien artean guardiak daude: gutxika guardiak murriztea eskatu dute, baita borondatezkoak izatea ere, eta lanordutik kanpoko lan gisa aitortzea. Lan egindako ordu horiek guztiak erretirorako kontabilizatzea nahi dute, tartean karrera profesionalean BAMEren prestakuntzan emandako urteak. Lan baldintzak hobetzeaz gain, osasunerako arriskuak txikitzeko eta kontziliazioa errazteko neurriak ere aldarrikatzen ditu kolektiboak.

Mobilizazioak

Goizean goizetik mobilizatzen hasiak dira langileak. Donostian, 07:30 aldera manifestazioa egin dute Donostiako Unibertsitate Ospitale inguruan. Bilbon, 11:00etan da protesta, Gurutzetako Ospitale aurrean. Iruñean, 19:00etan da manifestazioa, Gaztelu plazatik abiatuta. Ostegunean ere manifestazioa dute deituta Gipuzkoako hiriburuan, goizean Donostiako Unibertsitate Ospitalean, 7:30ean, eta arratsaldean Bulebarrean, 17:30ean. Medikurik gabe ez dago medikuntzarik! lelopean aterako dira kalera.