Urteko azken astean Hego Euskal Herrian lan istripuek bi hildako eragin dituzte. Astelehenean kamioi batek 59 urteko emakume bat harrapatu du Azagrara zihoala (Nafarroa ). Erkidegoko Gizarte Zerbitzutan familiei laguntzen lanean zebilen Nafarroa hegoaldeko herri desberdinetan. CCOO sindikatuak salatu duenez, "presio handia" jasotzen dute erabiltzaileei eskaintzen zaien arreta denbora eskasa delako. Gehitu du herri batetik bestera “korrika” batean ibili behar izanak arriskuak dakartzala. Sindikatuak esan du arriskuaz ohartarazi ziotela mankomunitateko presidenteari, hiru istripu izan zituztelako hainbat langilek.

Beste ezbeharra Laudion (Araba) gertatu da. LABek salatu duenez 58 urteko langilea hil da, lan istripu ez traumatiko batean. Sindikatuak gogorarazi du mota horretako istripuak –bihotzekoak, iktusak eta beste– heriotza eragiten duten lan istripuen lehen kausa bilakatu direla: "Lan zehatz batzuetan gertatzen dira, lanean jasotzen diren presioak, estresa bihotzekoak eta zirkulazio gaitzen ezinbesteko faktoreak dira eta gehienetan oinarrizko faktore gauzatzaileenak dira". Sindikatuak eskatu du lan eskubideak bermatuko dituzten politikak egin ditzatela.

74 pertsona hil dira 2025 urtean lan istripuen eraginez.