Biolentzia matxista dela eta, emakumezkoek egunero hiru salaketa jartzen dituzte Nafarroan, Foru Gobernuak jakinarazi duenez.
Datuak azken urteetakoen antzekoak dira, baina gora egin du erasoen ondoren Gobernuaren zerbitzu berezietan harrera behar duten emakumeen kopuruak: 500 izan ziren 2014an, eta 528, berriz, 2015ean.
Gaur egun Nafarroako populazioaren (640.790) %50,3 emakumezkoa da, baina oraindik ere eskubideen gauzatzean nabarmena da emakumezko eta gizonezkoen arteko desberdintasuna. Lan mundua da desberdintasunen arlo agerikoenetakoa: emakumezkoen langabezia tasa, adibidez, %15,12 da emakumezkoen artean eta %12,06 gizonezkoetan artean. Gizonezkoen aldeko soldata desberdintasuna %30erainokoa da esparru askotan, eta goi mailako postuetan lautik bakarra da emakumezkoa. Aitzitik, emakumezko gehiagok egiten ditu goi mailako ikasketak (%33,1 / %30,7) gizonezkoek baino. Lan hitzarmenetan ere badira desberdintasun handiak: emakumezkoen lan hitzarmen partzialak %32,8 dira eta gizonezkoenak %6,2 baizik ez.
Eskubide desberdintasuna handia dela iritzi dio Nafarroako Gobernuak eta jakinarazi duenez, 2016ko bere proiekturik garrantzitsuena Berdintasunaren Foru Legea izango da. Lan hori ongi egiteko, aldez aurretik emakumearen egoeraren diagnostikoa egingo dute. Horrekin batera onartuko da emakumeen aurkako biolentziari aurre egiteko foru legea, eta gobernuaren ustez, horrela “osatuta geldituko da emakumeen eskubideek oinarrizko gune zentrala izan dezaten ezinbesteko arau esparrua”.
Martxoaren 8ari begira, Nafarroako Berdintasunerako Institutuak antolatu dituen ekimenak jarraitu daitezke bere webgunean.