Urte zaila izan behar zuen 2025ak BBVArentzat, horixe zirudien: Sabadell bankua bereganatzeko ahaleginetan ibili da hilabeteetan, baina banku hark ukatu egin zuen iazko urrian eskaintza. Edonola ere, plan estrategikoak huts egin bazuen ere, plan ekonomikoak bete-betean asmatu du. Inoiz izandako irabazirik handienekin itxi du azken urtea jatorri bizkaitarra duen bankuak. 2024an baino %4,5 altuagoa da: 10.511 milioi eurorekin. Akziodunei ere poz bat edo beste eskaini die bankuak, inoizko dibidendurik altuenak banatu baititu: akzioko 96 zentimo, aurreko urtean baino %31 gehiago.

Kopuruz igo dira bere irabaziak, baina aurreikuspenen azpitik geratu da. Izan ere, 2024an %25 hazi ziren bankuaren irabaziak, eta analistek joera bertsua espero zuten, aurreikuspen altuagoak eginak baitzituzten. Igoera %4,5era mugatu izanak eragina izan du burtsan, mozkinen igoera iragarri ostean akzioek beherakada izan baitute, %4koa, eta zenbait momentutan %7ra ere heldu da. Carlos Torres BBVAko presidenteak lasaitasun mezua zabaldu du, jaitsierari garrantzia kenduta eta emaitzak heltzen ari direla ziurtatuta.

Aipagarria da, era berean, BBVAk Venezuelan dituen negozioak. Torresen hitzetan, herrialde hartan dagoen “nazioarteko banku bakarra” da, eta herrialdeak “hobera egingo duen” esperantza dutela azpimarratu du.