Baionako Fiskaltzak instrukzio bidea ireki du Miarritzeko (Lapurdi) Mouriscot aisialdi zentroko bi begiraleren aurka, sexu erasoa eta adin txikikoen ustelkeria delituak egotzita. Tartean bortxaketa bat ere ikertuko dute. Fiskaltzak berak zabaldutako ohar baten arabera, bi susmagarriak behin-behinean espetxeratzeko eskatu du.

Miarritzeko polizia etxeak bere gain hartutako ikerketa joan den uztailaren 12an hasi zen, hiru urte eta erdiko haur baten gurasoek salaketa jarri ondoren. Biktimak bere kabuz kontatu zuen udal instalazioan erasoak jasan zituela.

Orain arte, 3 eta 4 urte arteko hamasei haur dira kaltetutakoak, eta horietatik hamabi dagoeneko biktima gisa identifikatu dituzte. Fiskaltzaren oharrak nabarmendu duenez, sexu erasorik jasan izana adierazi ez duten gainerako adingabe batzuek "trauma zantzuak erakusten dituzte"; beraz, litekeena da biktima kopurua handitzea. Momentuz, lau familiek jarri dute salaketa polizia etxean.

Eskolaz kanpoko jarduerak eta lo egin gabeko eguneko kanpaldiak tartekatzen dituzte zentroan. 36 urteko gizonak bi urte zeramatzan bertan animatzaile; 21 urtekoa, berriz, uda honetan hasi zen lanean. Poliziak uztailaren 21ean atxilotu zituen biak beren etxeetan, eta egozten zaizkien akusazioak ukatu dituzte biek. Lau egun lehenago, uztailaren 17an, Serge Blanco Miarritzeko auzapezak funtzioetatik baztertu zituen; erabakia gertakarien berri izan ostean hartu zuen. 

Psikologoak familientzat

Blancok adierazi du auzian parte zibil gisa arituko dela herriko etxea, eta eskutitza ere bidali die gurasoei, familiei jakinarazteko bi psikologoren laguntzaz entzuketa dispositibo bat ezarriko dutela herriko etxean.

Ipar Euskal Herriko Itaiak, bere aldetik, erasoak salatu eta mobilizatzeko deia egin du, eta ortzegunerako protesta bat antolatu du: Miarritzeko herriko etxearen aitzinean izanen da, 19:00etan.