Hondarribiko udaltzainek tiroka hil zuten Babacar Welleren gorpua Senegalera eraman ahal izateko kanpaina abiatu dute senide eta lagunek, sareetan zabaldutako ohar batez azaldu dutenez, handiak baitira hori egin ahal izateko kostu ekonomikoak.
Senegaldarren komunitateak diru bilketa jarri du martxan: “Pertsona, elkarte eta kolektibo guztiak gonbidatzen ditugu ekimen solidario horrekin bat egitera. Ekarpen bakoitza, txikia izanda ere, gizatasun eta laguntza keinu bat da”, azaldu dute. Besteak beste, hileta gastuak ordaintzea eta familiari laguntza ekonomikoa ematea da kanpainaren helburua.
Dohaintzak zuzenean egin ahal izateko, Gipuzkoako Senegaldarren Elkarteko kontu korrontea jarri dute eskura (ES21 3035 0059 8905 9011 8129) eta Babacar Welle kontzeptupean egin daitezke ekarpenak. Horrez gain, 747 435 121 telefonora deituta edo reinaseck@gmail.com emailera idatzita ere bideratu daiteke laguntza hori.