Martxoaren 25ean UPNk salaketa aurkeztu zuen Korrikan ETAko kideen argazkiak erakutsi zirelako, zehazki Iruñeko Txantrea auzotik igaro zenean, baita Nafarroako beste zenbait herrietatik pasatu zenean ere. Ekintzek terrorismoa “goratu” eta biktimen “umiliazioa” sustatzen dutela azpimarratu du alderdiak eta argazkiak eraman zituzten adin txikikoak ere seinalatzen ditu. UPN baikor azaldu da fiskaltzak kaleratutako txostenarekin eta Auzitegi Nazionalak asteazkenean agindu die Espainiako Poliziari eta Guardia Zibilari gertakaria iker dezaten.

Txostena kaleratu ondoren, Cristina Ibarrola UPNko lehendakariak sare sozialetan gertakaria “amaieraraino ikertzeko” eta biktimen familientzako “justizia” eskatu ditu. Gainera, Senatuan azaldu zuen elastikoetan eta karteletan irudiak eraman dituztenez gain, lasterketaren antolatzaileek ere badutela ardura, beraien “onespenarekin” egin baitzen. Horregatik, hainbat eskakizun egin ditu: antolatzaileek barkamen publikoak eskatzea, berriro ez gertatzeko neurriak hartzea eta ekonomikoki Korrika babestu duten entitateek beraien ekarpenak bueltatzeko eskatzea.

Eztabaida Senatura iritsi da

UPNk gaiari eutsi dio Senatuan eta euskal presoei egiten zaizkien Ongi Etorriak azpimarratu ditu; PPk eta Voxek ere gaia aintzat hartzekoa dela kontsideratu dute. Isunak jartzeko lege berria egitearen inguruan hausnartu dute alderdiek goi ganberan eta PPren gehiengopean ondorengo emaitzak atera dira: 147 aldeko bozka PP, Vox eta UPNren eskutik; 112 kontrako bozka PSOE, EAJ eta EH Bilduren eskutik; eta lau abstentzio.

PPren ekimenez, zazpigarrenez helduko zaio gaiari Senatuan eta oraingoan biktimen errekonozimendu eta babeserako legeari “terrorismoaren asaldura ekintzen” prebentzio eta santzioa bermatzeko neurriak gehitu nahi dizkiote, Naizek jaso duenez. 200 eta 150.000 euroko arteko isunak ezarri nahi dituzte, ekintzaren “larritasunaren” arabera finkatuko direnak. Gainera, ZIGORTUEI kargu publikoetara sarbidea ukatzeko aukera izango da, eta urtebete eta bost urte artean dirulaguntzak jasotzeko aukera etengo zaie.