Maiatzaren 13an jendarteratuko da Ategorrietan Fisterra proiektua, asteazkenez Donostian, Parte Zaharreko San Jeronimo kaleko Kripta aretoan, 18:30ean. ARGIAko kazetari eta liburuaren editore Urko Apaolazaren gidaritzapean, komikia aurkeztuko dute Beñat Apalategi, Markel Ormazabal eta Lander Arbelaitz gidoigileek, baita Malen Gainzaran ilustratzaileak ere.

Nobela grafikoa da proiektuaren muina, Euskal Herriko XX. mendeko langileen kontrako sarraskirik handienaren historia ikuspegi propioz kontatzen duen komikia; eta horri lotuta doa biniloa, komikiaren soinu banda, bi kantukoa, biak ere elkarlanean konposatuak: lehena, Niña Coyote eta Chico Tornado donostiarrek eta Bala galiziarrek egina. Hona bideoklipa, Arkaitz Artolak egina.

Eta bigarrena, Gailu andoaindarrek eta Nakar donostiarrek sortu dute, Ategorrietako sarraskiari izenburukoa. Kantu honen hitzak Beñat Gaztelumendik egin ditu. Hemen duzu, jarraian, Peru Isasik eginiko bideoklipa.

Aurkezpen gehiago

Lehen jendarteratze horrez aparte, maiatzaren 21ean Donostiako Gros auzoko Marruma elkartean egongo dira egileak. Izan ere, hainbat ostegunetan jendaurreko bideopodcastak grabatzen dute Marruman, eta Ategorrietan Fisterra proiektuko kideak izango dira gonbidatuak egun horretan. 19:00etan grabatuko da, publikoarekin.

Bestalde, Ategorrietako sarraskiaren 95. urteurrena maiatzaren 27an izango da, asteazkenez. Pasaiako Udalaren babesaz argitaratu da Ategorrietan Fisterra komikia, eta udal horrek hainbat ekintza antolatuko ditu egun horretan; goizean, besteak beste, mural bat margotuko dute, eta irudigileak propio erabiliko ditu komikian ageri diren irudiak eta estiloak. Arratsaldean, berriz, Ategorrietan Fisterra proiektua aurkeztuko da Trintxerpeko liburutegian, 19:00etan. 

Aurreikusitako agenda ekainaren 11n borobilduko da, biniloaren aurkezpenarekin. Ostegun horretan Donostiako Egia Recordsen egingo da aurkezpena, 18:30ean. 

*** Zure herrian aurkezpen edo hitzaldiren bat lotu nahiko bazenu, idatzi solasaldiak@argia.eus helbidera