Hatortxu Rocken errautsetatik jaiotako Aske jaialdiaren lehen edizioa ospatuko da Atarrabian (Nafarroa) hilaren 27an. Euskal Herriaren eta euskal jendartearen "askatasuna" aldarrikatzeko dozena bat talde igoko dira agertokira. Jasaten ari den genozidioaren aurrean babesa adierazi dio jaialdiak Palestinako herriari, eta Israelen kontrako boikot dinamikarekin bat egin du. Ondorioz, barran kontsumitutako edarien artean ez da israeldar jatorriko produkturik izango. Horrez gain, Nafarroako produktuak lehenetsiko dituzte sukalde eskaintzari dagokionez, "geure balioen isla izan dadin ahalik eta neurri handienean".

Ohar bidez, Askeren antolakuntzak adierazi du "lan zaila" dela erabateko boikota erdiestea, "mugak eta zailtasunak" handiak direlako, baina pozik daudela hasieran jarritako helburua lortu izanagatik. BDZ ekimenarekin eginiko elkarlanak ahalbidetu du neurria, eta hurrengo edizioetan ere bide horretan jarraituko dute. "Aske izan nahi dugunok desio bera dugu gainontzeko herri zapalduentzat", adierazi dute. 

Egitaraua eta bestelako informazio gehiago Askeren webgunean kontsulta daiteke.