Naiz hedabideak ikuskatzaileek egindako txostenen mamia landu du artikulu batean eta Nafarroako Administrazioak eskola horretan esku hartu ez izana salatu du. Santa María de los Milagros ikastetxea Gesalatz bailarako Argiñao kontzejuan dago. Maestro Ávila Fundazioak Fuerza Nueva eta Voxekin loturak ditu, Gedar hedabidearen arabera. Fundazioa sekta sedebakanistakoa da. Katolizismo tradizionalistan kokatzen dira. 55 haur daude ikastetxean. Umeak Osasunbidean izena emanda daude eta Nafarroan erroldatuta.

Sei aldiz eskatu dute ikastetxea homologatzea, baina ez dute lortu. Bi eskariri ezezkoa eman dio Administrazioak eta beste lau baliogabetzeko bidean dira. Ikuskatzaileen txostenaren arabera, ezinezkoa da curriculuma ontzat ematea. Ikasketen ardatza erlijio katolikoa da, II. Kontzilioaren aurreko katolizismoan oinarrituta. Naiz hedabideak jarritako adibidearen arabera, Lehen Hezkuntzan Historia Sakratua sakon ikasten dute, eta aldiz, Gaztelaniaren ikasketan ez dira iristen curriculumak eskatzen dituen osagaiak lantzera. Derrigorrezko ikasgai batzuk ez dituzte eman ere egiten, adibidez, Musika eta Heziketa Fisikoa. Ikastetxe homologatuen ordutegitik urrun, egunean lau eskola-ordu dituzte. Haurrek elkarrekin ikasten dute 6 urtera arte, eta adin horretatik aurrera neska eta mutilak bananduta aritzen dira. 6 urtetik gorako umeen ikasgelak “iluntzat” jo dituzte ikuskatzaileek, eta txostenetan jaso dute berogailurik ez daukatela.

Estelerriko bizilagunak kezkatuta

2025eko azaroaren 22an manifestazioa egin zuten Estellerrian, “sekta ultrakatoliko eta faxista” haien herrietan ez zutela nahi erakusteko. Gedar hedabideak jaso zuenez, manifestaziorako deia egin zutenean honela adierazi zuten: "Ez dugu gure seme-alabek ideia faxistak sustatzen dituen sekta batekin elkarbizitzerik nahi; emakumea gizonaren menpe jartzen duena, arrazakeria, espainolismoa, euskararekiko arbuioa, klasismoa edo sexu-aniztasunaren jazarpena sustatzen dituena". Estellerrian ongi etorriak ez zirela eta alde egiteko eskatu zieten, eta adierazi zuten presioa egiten jarraituko zutela “faxistak eroso ez sentitzeko”. Fundazioak Abartzuzako Anderatz eraikin publikoa erosia du, barnetegi zahar bat, inguruko lur eta guzti. Manifestaziora deitu zuten bizilagunek salatu zuten udalak eraikina erosteko baimena eman izana eta tokiko erakundearekin gaiaz hitz egiteko harremanetan jartzeko oztopoak jarri izana.