ARGIA Fototeka martxan da, Fototeka.argia.eus helbidean. 100.000 argazkitik gora biltzen ditu, denak lizentzia librean eta kalitate handian deskargatu ahal izateko moduan. Tamaina eta izaera horretako eduki libreko Euskal Herriko irudi-banku handiena da, eta munduko handienetako bat.

Ehun urteko historian hamaika gertakari historikoren lekuko izan da ARGIA eta 1960ko hamarkadatik aurrera horietako asko irudiz jaso ditu, batez ere 1976an magazin formatua hartu eta argazkiei toki gehiago egiten hasi zenetik. Artxibo hori handitzen joan da hamarkadaz hamarkada, 700 argazki egilek baino gehiagok egindako ekarpenari esker. Bere ondarea herritarrekin partekatu nahi du orain ARGIAk.

Nabarmentzekoak dira 1970eko eta 1980ko hamarkadako argazkiak: manifestazioak, atentatuak, protesta ekosozialak, euskalgintzako mugimenduaren ekimenak, bertso jaialdiak... Milaka argazki dira, asko sinadurarik gabeak, erredakzioko garai hartako kazetariek edo kolaboratzaileek eginak.

Azken hamarkadetako argazkiak ere badaude, M8ko manifestazioak, herri harresiak, edo greba orokorrak, batzuk aipatzearren. Eta horrez gain, ARGIAn urteotan guztiotan elkarrizketaturiko politika eta kultura munduko ehunka pertsonaia ezagunen erretratuak aurkitu daitezke.

Urte askotako lanaren emaitza

Duela hainbat urte hasitako lanaren emaitza da Fototeka. ARGIAren argazki artxibo zaharra galtzeko zorian zela ikusita, berreskuratu eta digitalizatzeari ekin genion, Eusko Jaurlaritzaren laguntzaz eta, batez ere, ARGIA diruz babesten duten milaka harpideei esker. Bide horretan, webgunea antolatu eta argazkilariekin harremanetan izan da ARGIA, proiektua azaldu eta ekarpenak jasotzeko.

Argazkiak Creative Commons lizentzia libreetan daude eta erabiltzaileek lizentzia horien baldintzak errespetatu beharko dituzte ezinbestean, esaterako egilea eta iturria behar bezala aitortzea. Fototekaren helburuetako bat argazkien atzean dagoen lana modurik onenean ikusarazi eta aitortzea da. Horretarako, webguneak argazkien inguruko informazio zehatza eskaintzen du, gaia, egilea, protagonista eta urtea barne.

ARGIAk edukiak libre eskaintzeko egindako hautuan urrats bat gehiago da honakoa, komunikazio proiektu honek kultura librean sinesten duelako. Zentzu horretan, Fototeka proiektu irekia da, etengabe elikatzeko bokazioz jaioa, eta herritarrek etxean dituzten argazki historiko eta esanguratsuak ere igo ahal izango dituzte bertara, baldintza eta berme guztiekin.