ARGIA.eus

2020ko ekainaren 01a

Antonio Basagoiti: "PPkoa naiz eta EAJk gauza onak egin dituela onartzen dut"

  • Antonio Basagoiti PPren lehendakaritzarako hautagaiak eman zion asteazkenean amaiera Deustuko Unibertsitateak antolatutako Giza Zientziak.Gipuzkoa XXI foroaren lehenengo atalari. Bere politika-pop delakoarekin bat datozen ideia liberalez beteriko hitzaldia eman zuen Donostiako campusean. Hark esandakoekin ados egon ala ez, unibertsitatean bildu ginen ikasle askoren iritziz, aurreko astean mintzatu zen Patxi Lopez PSE-EEko idazkari nagusiari partida irabazi zion Basagoitik.

2008ko azaroaren 07a

 

Foroaren baitan egindako aurreko hiru hitzaldietan baino askoz jende gehiago bildu zen Basagoitiren agerraldia ikusteko. Forman ez zuen ezer berririk aurkeztu. Ohikoa denez, kanpaina egiteko aprobetxatu zuen. Horrelako foroei izen orokorregia (kasu honetan Ekintza politikoa eta herritarrak) jartzearen ondorioa izan liteke. Hala esan zuen Patxi Lopezek pasa den astean, horrelako aukeraren aurrean politikariek nahi dutena esateko aprobetxatzen dutela gaineratuz.

 

Hala ere, Patxi Lopezen mitina ez bezala, prentsaurrekoaren antza hartu zuen Basagoitiren hitzaldiak. Gehienbat, bere kanpainaren helburuak eta egitasmoak aurkeztu zituen, aukerarik onena bera zergatik den argitzeko. PPk normalean erakusten ez duen jarrera irekia erakutsi zuen Basagoitik, eta ez bakarrik edukian (emakumearen egoera, gazteak, enplegua eta abar), baizik eta entzuleekiko izan zuen jarreragatik ere, entzuleekin hitz egiteko, autokritika egiteko eta bere etsaien bertuteak onartzeko borondatea erakutsi baitzuen: “EAJk gauza batzuk oso ondo egin ditu eta hori onartzen dut, baina ideiarik gabe gelditu dira eta orain autodeterminazioan pentsatzen dute bakarrik”. Bere ustez, “Estatu Batuetan egin duten antzera, Euskadik ere aldaketa behar du”.

 

Zentzu horretan, edonorekin hitz egiteko prest aurkeztu zuen bere burua, iraganean ikuspuntu ezberdina zuten pertsonekin hitz egin zuela gogoraraziz. Basagoitik harritu egin ninduen. Onerako, gainera. Politikari ona dela erakutsi zuen; bere ideiekin ados egon ala ez, ideia horiek berak argi dituela onartu beharra dago. Aurreko astean, Patxi Lopezek, sinestea kostatzen zen mozorroa zeraman. Gazteokin konektatu nahi izan zuen, komentario ironiko eta barregarrien bidez, baina artifizialegi geratu zitzaion.

 

Honetatik ondorio bat atera daiteke. Politikariei foroetan hitza ematen bazaie, kanpaina egiteko baliatuko dute. Euren helburuak lortzeko eraginkorra dela ikusita (Lopezen kasua salbu), ulergarria da horrela izatea. Baina eragin kaltegarria du, foroen izateko arrazoia usteltzen duelako. Konponbidea izenburu zehatzagoak jartzea izan liteke? Batek daki!

ARGIAn egiten dugun kazetaritza independenteak bultzada merezi duela uste duzu?

Informazio askea lantzen dugu ARGIAn, langileok gara proiektuaren jabeak eta gure informazioen atzean ez duzu sekula multinazionalik, bankurik edo alderdi politikorik topatuko. Gure ustez, burujabetza guztien oinarrian dago informazio burujabetza, ezagutzen dugunaren gainean pentsatzen eta erabakitzen dugu. Horregatik diogu kazetaritza independentea dela demokraziaren oinarrietako bat.

Aldizkaria paperean etxean edo e-postan PDFan jaso nahi duzu? Pozik hartuko zaitugu ARGIAko komunitatean. ARGIAkoa izateko, nahi eta ahal duzun ekarpena egin dezakezu, eta bueltan egoki ikusten duzuna eskatu. Indartu dezagun indartzen gaituena!


Azkenak

Azkenak
Argia buletina
Egunaren laburpena
zure e-postan
Eguneraketa berriak daude